📌 Ma’lumotlar 2026-yil noyabr holatiga ko’ra.
Assalomu alaykum, hurmatli o’quvchilar. Bir necha yil oldin oila birlashtirish vizasi haqida batafsil post yozgandim. O’shandan beri ba’zi qoidalar ancha yengillashdi, hujjat topshirish tartibi esa o’zgardi. Ko’pchilik hali ham eski ma’lumotlar bilan hujjat tayyorlab, vaqt yo’qotyapti.
Shuning uchun bugun 2026-yildagi holat bo’yicha qisqa va aniq yo’riqnoma bermoqchiman: kimlar uchun nima talab qilinadi, qanday hujjatlar kerak va jarayon qanday kechadi.
1️⃣. Germaniyadagi turmush o’rtog’ingizning vizasi muhim
Talablar Germaniyada yashayotgan turmush o’rtoqning qanday yashash ruxsatnomasi borligiga qarab farq qiladi:
- Blue Card, mutaxassis (Fachkraft) yoki ilmiy izlanish vizasi bo’lsa: O’zbekistondagi turmush o’rtoqdan nemis tili (A1) talab qilinmaydi va kvartira o’lchami (Wohnraum) tekshirilmaydi. Blue Card haqida bu yerda.
- Talaba yoki Ausbildung vizasi bo’lsa: turmush o’rtoqni olib kelish mumkin, agar viza berilganda allaqachon nikohdan o’tgan bo’lsangiz va Germaniyada 1 yildan ko’p qolishingiz kutilsa. Germaniyaga kelgandan keyin uylansangiz, odatda 2 yil yashagan bo’lishingiz kerak. Bunda O’zbekistondagi turmush o’rtoq A1 sertifikatini topshiradi, Germaniyadagi turmush o’rtoq esa yetarli daromad va uy-joy borligini ko’rsatadi.
- Au Pair, FSJ, BFD yoki Hospitation kabi qisqa muddatli vizalar bo’lsa: odatda oila birlashtirish mumkin emas.
Ikkala turmush o’rtoq ham kamida 18 yoshda bo’lishi shart.
2️⃣. Daromad qancha bo’lishi kerak?
Ausländerbehörde oilangiz davlat yordamisiz yashay olishini tekshiradi. Hisob taxminan shunday: kvartira ijarasi (issiq) + har bir katta odam uchun Bürgergeld miqdori + bolalar uchun alohida summa. 2026-yilda er-xotinning har biri uchun 506€ hisoblanadi.
Misol: kvartira ijarasi 650€. Ikki kishi uchun 2 × 506€ = 1012€. Ya’ni oyiga «qo’lga» (Netto) kamida 1662€ atrofida daromad kerak bo’ladi. Bu eng kam taxminiy hisob. Aniq summani har bir shaharda Ausländerbehörde o’zi hisoblaydi va unga boshqa xarajatlarni ham qo’shishi mumkin, shuning uchun oldindan so’rab oling.
O’zimning tajribamdan: oylik ozgina yetmasa, yetmagan qismini 12 oyga bloklangan hisob raqamga qo’yib viza olganlar ham bor. Bu variantni ham Ausländerbehördedan so’rab ko’ring.
3️⃣. Nemis tili (A1)
Agar yengillik sizga tegishli bo’lmasa, O’zbekistondagi turmush o’rtoq A1 darajasidagi sertifikat topshirishi kerak. Odatda Goethe-Institut yoki telc’ning «Start Deutsch 1», ÖSD’ning «Grundstufe Deutsch 1» sertifikatlari yoki TestDaF qabul qilinadi. Ba’zi elchixonalar sertifikat 1 yildan eski bo’lmasligini ham so’raydi.
A1 uchun 2–3 oy kifoya qiladi. Maslahatim: sertifikatni hujjatlar navbatini kutayotgan vaqtda olib qo’ying, shunda vaqt yo’qotmaysiz.
4️⃣. Hujjatlar ro’yxati
Toshkentdagi Germaniya elchixonasi quyidagilarni so’raydi:
- To’ldirilgan va imzolangan ariza, 2 ta biometrik rasm (3,5 × 4,5 sm, 6 oydan eski bo’lmagan)
- Kamida yana 1 yil amal qiladigan pasport va uning nusxasi
- Germaniyadagi turmush o’rtoqning pasporti va yashash ruxsatnomasi (Aufenthaltstitel) nusxasi
- Ikkala turmush o’rtoq pasportidagi kirish-chiqish muhrlari nusxasi
- Germaniyadagi turmush o’rtoqning Meldebescheinigung (ro’yxatdan o’tganlik) hujjati
- Nikoh guvohnomasi va uning tasdiqlangan nemischa tarjimasi
- Farzandlar bo’lsa, tug’ilganlik haqidagi guvohnoma va tarjimasi
- A1 sertifikati (agar talab qilinsa)
Hujjatlarni ro’yxatdagi tartibda, A4 qog’ozda, steplersiz tayyorlang. Elchixona to’liq bo’lmagan hujjatlar rad etilishi mumkinligini alohida ta’kidlaydi. Tibbiy sug’urta ariza topshirishda shart emas, uni keyinroq so’rashlari mumkin. Ba’zi hollarda O’zbekistonda berilgan nikoh guvohnomasining haqiqiyligi alohida tekshiriladi, bu jarayonni biroz cho’zishi mumkin.
5️⃣. Jarayon qanday kechadi?
1) Ariza endi asosan onlayn, digital.diplo.de (Auslandsportal) orqali beriladi. Oila birlashtirish uchun termin o’zingiz tanlab olmaysiz: navbatga yozilasiz va elchixona terminni email orqali yuboradi.
2) Termin kuni hujjatlarning original va nusxalari bilan elchixonaga borasiz. Viza to’lovi 75€ (voyaga yetmaganlar uchun 37,50€), so’mda naqd to’lanadi.
3) Elchixona hujjatlarni Germaniyadagi turmush o’rtoq yashaydigan shahardagi Ausländerbehördega yuboradi. Ular daromad va kvartira hujjatlarini (Lohnabrechnung, Mietvertrag) so’rashi mumkin.
4) Elchixona ma’lumotiga ko’ra, javob odatda 3–6 oyda chiqadi. Viza berilgach, Germaniyaga kelib, ro’yxatdan o’tasiz va Ausländerbehördedan yashash ruxsatnomasini olasiz.
Yaxshi xabar: yashash ruxsatnomasini olgan turmush o’rtoq Germaniyada darhol ishlash huquqiga ega bo’ladi.
6️⃣. Ota-onalarni ham olib kelsa bo’ladimi?
Agar Germaniyadagi farzand 2024-yil 1-martdan keyin mutaxassis sifatida ish uchun yashash ruxsatnomasini olgan bo’lsa, ota-onalar va qaynota-qaynonalarni ham olib kelish mumkin. Bu Ausländerbehörde qaroriga bog’liq va oilaning daromadi yetarli bo’lishi shart. Boshqa hollarda ota-onalarni faqat mehmonga chaqirish mumkin.
7️⃣. Viza rad etilsa nima qilish kerak?
2025-yil 1-iyuldan boshlab elchixona remonstratsiya (qayta ko’rib chiqish arizasi) qabul qilmaydi. Endi rad javobiga qarshi faqat Berlin ma’muriy sudiga (Verwaltungsgericht Berlin) nemis tilida shikoyat qilish mumkin. Ko’p hollarda kamchilikni tuzatib, qaytadan ariza topshirish osonroq. Batafsil bu yerda.
Mening maslahatim
1️⃣. Hujjat tayyorlashni nikohdan keyin darhol boshlang. Navbat va tekshiruv birga yarim yilgacha cho’zilishi mumkin.
2️⃣. Germaniyadagi turmush o’rtoq termin kunigacha kvartirani topib, ijara shartnomasini tayyor qilib qo’ysin.
3️⃣. Agentliklarga pul bermang. Elchixona hech qanday vositachi bilan ishlamasligini o’zi yozib qo’ygan.
4️⃣. Turmush qurgandan keyin soliqda ham yengilliklar bor, bu haqda alohida post yozganman.
Savollaringiz bo’lsa, izohlarda yozib qoldiring, imkon qadar javob berishga harakat qilaman.
Foydali havolalar
- Toshkentdagi Germaniya elchixonasi: turmush o’rtoq vizasi
- Elchixona: milliy viza, to’lov va muddatlar
- Make it in Germany: turmush o’rtoqni olib kelish
Post muallifi: Abu Umar
